ಪ್ರತ್ಯುತ್ತರ

 

ಇತ್ತು ಅದಿತ್ತು ತನ್ನ ಪಾಡಿಗೆ ತಾನಿತ್ತು 

ಶಮೀಕ ಕಾನನದೆ ತಪಗೈವಂತೆ 

ಜೀವಜಗವನ್ನೆಲ್ಲ ಕಾಪಿಡುತಲಿತ್ತು

ಸುಧೆಯೂಡುತಿತ್ತು ಮುದ ನೀಡುತಿತ್ತು 

ಬೆಳೆಯುತಿತ್ತು ಬೆಳೆಸುತಿತ್ತು ಬಳಕೆಗೂ

ಒದಗುತಿತ್ತು ಬೇಕಿದ್ದನೊದಗಿಸುತಿತ್ತು 

ಅತ್ಯಾಶೆಯೊಡಲ ನರ ಕಾಲಿಡುವವರೆಗೂ 

ಬಂದವನು ತನ್ನ ತಾ ಅರಸನೆಂದುಕೊಂಡ 

ಕಂಡಿದ್ದೆಲ್ಲವನು ಕಡಿದುಂಡ ಕೊಂದುಂಡ 

ಸ್ವಾರ್ಥ ಕ್ಷುಧೆ ತೃಷ್ಣೆ ತೀರದಾಗ ಸತ್ತ ಹಾವ 

ಮುನಿಕೊರಳ್ಗಗಿತ್ತು ವಿವೇಕ ಮರೆದ ಜೀವ

ಎಲ್ಲವನು ಎಲ್ಲ ಸಮಯದೊಳ್ ತಾಳ್ವ 

ಸಹನೆ ಯಾರಿಗೂ ಇಲ್ಲ ಸಲ್ಲ ಅವಶ್ಯವಿಲ್ಲ 

ಶಮೀಕಸುತ ತಂದೆಯಿಂದುಪಕೃತನಿರ್ದ 

ಅಪ್ಪನ ಸ್ಥಿತಿ ನೋಡಿ ಉರಿದೆದ್ದು ಕಿಡಿಕಾರ್ದ 

ಸಗ್ಗದಂತಿರ್ದ ನಿಸರ್ಗವ ಮಸಣಿಸಿದವ 

ಶಪಿಸುತಿನ್ನೇಳು ದಿನದಲಿ ಮರಣಿಸಲಿ 

ಮತ್ತದೇ ಮರುಕಳಿಸಿದೆ ನರನಾಟ ಮೀರಿದೆ 

ಪ್ರಕೃತಿ ಮುಳಿದಿದೆ ಲೆಕ್ಕವಿಡದೆ ನಡೆಸಿದೆ 

ನಡೆಯುತ್ತಲಿದೆ ಜೀವಂಗಳಾಪೋಶನ