ಮಗುವಿನ ಮನದಾಳ

ವಾರದಲ್ಲಿ ಒಂದು ದಿನಕೆ ಬಂದು ನಿಂತಿದೆ
ಜಣಗುಡುವ ಬಳೆಧರಿಸುವ ಸಂಭ್ರಮ
ಉಳಿದ ದಿನ ಶಾಲೆ ಎಂಬುದೊಂದಿದೆ
ಧರಿಸೆ ಶಾಲೆಯಲ್ಲಿ ಪಡೆವೆ ಶಿಸ್ತಿನ ಕ್ರಮ

ವಾರದ ರಜೆ ಭಾನುವಾರ ಬಳೆಯ ಧರಿಸಿದೆ
ನಿಮ್ಮ ಕೈಯ ತೆರದಿ ನನದು ಕಾಣಲು
ಮತ್ತೆ ತೊಡಲು ಆರು ದಿನ ಕಾಯಬೇಕಿದೆ
ಗಲಗಲ ಬಳೆ ಸದ್ದ ನಾನು ಕೇಳಲು

ಕುಂಕುಮ ಹಣೆಗಿರಸಬಾರದೆಂಬ ರೂಲಿದೆ
ಹೂವ ಮುಡಿಯಬಾರದಂತೆ ಎಂದಿಗೂ
ಬಳೆಯ ತೊಟ್ಟವರ್ಗೆ ಒಳಗೆ ಅನುಮತಿಯಿರದೆ
ಸಂಪ್ರದಾಯದುಡುಗೆ ಸಲ್ಲ ಇಂದಿಗೂ

ಪುಟ್ಟ ಬಾಯಿ ದೊಡ್ಡ ಪ್ರಶ್ನೆ ಕೇಳಲೇನು ಹೇಳು
ನಮ್ಮತನವದೆಂಬುದೊಂದು ನಮಗಿಲ್ಲವೆ
ತುಂಡುಲಂಗ ಧರಿಸಿದೊಡನೆ ಬಂದುದೇನು ಹೇಳು
ಮೈಯ ತುಂಬ  ಬಟ್ಟೆ ಧರಿಸಬೇಡವೆ

ಯವನರೆಮ್ಮ ತೊರೆದು ಏಳುದಶಕವಾಯಿತು
ನಾವು ಅವರನನುಕರಿಸುತಲಿರುವೆವು
ಜಗಕೆ ಬಾಳ ತಿರುಳನೊರೆದ ರಾಷ್ಟ್ರಕೇನಾಯಿತು
ಸ್ವಂತಿಕೆಯನು ಮರೆತು ಬಾಳುತಿರುವೆವು