ಬೇಡಿಕೆ

ಸಮಯವಾಯಿತೆಂದು ನೀನು
ಮುಳುಗಿಹೋದರೇನು ಚೆನ್ನು
ಕತ್ತಲೆ ಸಾಮ್ರಾಜ್ಯ ತಾನು
ರಾರಾಜಿಸದೇನು

ಜಗದ ಜೀವಕೋಟಿಗೆಲ್ಲ
ನಿನ್ನದೆ ಬಲ ಬೇರೆಯಲ್ಲ
ತಿಳಿದು ಮುಳುಗುತಿರುವೆಯಲ್ಲ
ನಿನಗಿದು ಸಲ್ಲ

ಬಳಸಿ ನಿನ್ನ ಶಕ್ತಿಯನ್ನು
ಜೀವಜಾಲ ಧನ್ಯತೆಯನು
ತೋರೆ ಇಲ್ಲಿ ನರನು ತಾನು
ಮೆರೆಯುತಿರುವನು

ಎಲ್ಲೆಡೆ ಬೆಳಕನ್ನು ಬೀರಿ
ಕರ್ತವ್ಯದ ಮಹಿಮೆ ಸಾರಿ
ನಡೆವ ನೀನೆ ಮಾದರಿ
ಭುವಿಗೆ ನೀನೇ ಐಸಿರಿ

ಭುವಿಗೆ ಬೆಳಕ ಬೀರಿ ನೀನು
ಹರಡಿಹ ತಮ ತೊಳೆಯಲೇನು
ನರನ ಮನದ ತಿಮಿರವನು
ತೊಡೆಯಲಾಗದೇನು?

ನಾನೇ ಹೆಚ್ಚು ಎನುವ ತಿಮಿರ
ನನದೆ ಎಲ್ಲ ಎನುವ ಅಮಲ
ದೇವನ ಧಿಕ್ಕರಿಪ ತೆವಲ
ತೆಗೆಯಲಾರೆಯೇನು?

ಇಂದು ನೀನು ಮುಳುಗಲೇನು
ನಾಳೆ ನಿಜದಿ ಬರುವೆ ನೀನು
ಅಹಮಿನಲ್ಲೇ ಮುಳುಗಿದೆನಗೆ
ನಾಳೆ ನಿನ್ನ ಕರುಣ ಕಿರಣ
ನಿಜದಿ ದೊರೆವುದೇನು
ನನಗೆ ನಾಳೆ ಇರುವುದೇನು
ಹೇಳೆನಗೆ ನಾಳೆ ಇರುವುದೇನು